د کانکور امادګی ( د حساب برخه )

د کانکور د ریاضیاتو (د حساب برخه) کورس یو بنسټیز او منظم ښوونیز کورس دی چې د کانکور ازموینې د ګډونوالو د چمتووالي لپاره جوړ شوی دی. د دې کورس موخه د زده‌کوونکو د حسابي مهارتونو پیاوړتیا او د ریاضیاتو د بنسټیزو مفاهیمو ژوره پوهه رامنځته کول دي. په دې کورس کې زده‌کوونکي له لومړنیو موضوعاتو لکه د ریاضیاتو تعریف، عددونه، حسابي عددونه او د عددونو طبقه‌بندي څخه پیل کوي، او وروسته د حساب بنسټیزو عملیاتو؛ لکه د صحيحو عددونو جمع، تفریق، ضرب او تقسیم او د هر عملیاتو له ځانګړتیاوو سره آشنا کېږي. همدارنګه مهم موضوعات لکه پر ۲، ۳، ۴، ۵، ۶، ۷، ۸، ۹، ۱۰، ۱۱ او ۱۲ د عددونو د وېشلو قواعد، توان، عددي عبارتونه، اولي او مرکب عددونه، د عددونو تجزیه، مقسوم‌علیهونه او مضربونه، تر ټولو لوی ګډ مقسوم‌علیه (GCD)، تر ټولو کوچنی ګډ مضرب (LCM) او د دوی ترمنځ اړیکه په ساده، روښانه او پړاو په پړاو ډول تدریسېږي. دا کورس د مفهومي تشریحاتو، بېلګو او عملي تمرینونو په وړاندې کولو سره زده‌کوونکو ته مرسته کوي چې د حسابي مسئلو د حل وړتیا لوړه کړي، د محاسبې سرعت او دقت ښه کړي، او د کانکور د حساب برخې پوښتنو ته د سم او چټک ځواب ویلو لپاره بشپړه چمتووالی ترلاسه کړي.